சமீபத்தில் நடந்து முடிந்த 17-வது ஆசிய கோப்பைத் தொடரில் என்ன நினைத்து இந்தியாவும், பாகிஸ்தானும் ஒரே குழுவில் இருக்கும்படி போட்டி அட்டவணை தயார் செய்தார்களோ, அதற்கேற்றாற்போலவே தொடச்சியாக லீக், சூப்பர் 4, இறுதிப் போட்டி என 3 ஞாயிற்றுக்கிழமைகளிலும் இந்தியா, பாகிஸ்தான் மோதின.
மூன்று போட்டிகளிலும் இந்தியாவே வெற்றிபெற்று சாம்பியன் ஆனது.
ஆனால், இந்த மூன்று போட்டியிலும் இந்தியா வீரர்கள் பாகிஸ்தான் வீரர்களிடம் கைகுலுக்காதது, களத்தில் இரு அணி வீரர்களும் சைகைகள் காட்டியது, பாகிஸ்தான் கிரிக்கெட் வாரிய தலைவர் மற்றும் அந்நாட்டு அமைச்சர் என்பதால் என்ற காரணத்தால் ஆசிய கிரிக்கெட் கவுன்சில் தலைவர் மொஹ்சின் நக்வியின் கரங்களால் கோப்பை வாங்க மாட்டோம் என இந்தியா வீரர்கள் புறக்கணித்தது ஆகிய சர்ச்சைகள் ஆசிய கோப்பை தொடருக்கு மிகப்பெரிய விளம்பரமாகவும் அமைந்தது.
இத்தகைய சூழலில், இந்தியா இலங்கை இணைந்து நடத்தும் மகளிர் ஒருநாள் உலகக் கோப்பைத் தொடர் செப்டம்பர் 30-ம் தேதி முதல் நடைபெற்று வருகிறது.
இதில், இந்தியாவும் பாகிஸ்தானும் வரும் ஞாயிற்றுக் கிழமை (அக்டோபர் 5) கொழும்பு மைதானத்தில் நேருக்கு நேர் மோதுகிறது.
இந்நிலையில் இதிலும் பாகிஸ்தான் வீராங்கனைகளிடம் இந்திய வீராங்கனைகள் கைகுலுக்கமாட்டார்களா என்ற கேள்வியெழுந்திருக்கிறது.
இது குறித்து BBC Stumped நிகழ்ச்சியில் கேட்கப்பட்ட கேள்விக்கு பதிலளித்திருக்கும் இந்திய கிரிக்கெட் கட்டுப்பாட்டு வாரியத்தின் (BCCI) செயலாளர் தேவஜித் சைகியா, “என்னால் எதையும் முன்கூட்டியே கூற முடியாது.
ஆனால், குறிப்பிட்ட அந்த விரோத நாட்டுடனான எங்கள் உறவு அப்படியே உள்ளது. கடந்த வாரத்தில் (ஆசிய கோப்பையில் இந்தியா பாகிஸ்தான் விவகாரம்) இருந்து எந்த மாற்றமும் இல்லை.
கொழும்புவில் பாகிஸ்தானுக்கெதிரான போட்டியில் இந்தியா விளையாடும். அதில், கிரிக்கெட்டின் அனைத்து நெறிமுறைகளும் பின்பற்றப்படும்.
கிரிக்கெட்டின் எம்.சி.சி (MCC) விதிமுறைகளில் என்ன இருந்தாலும் பின்பற்றப்படும் என்று மட்டுமே நான் உறுதியளிக்க முடியும்.
கைகுலுக்குவார்களா, கட்டிப்பிடிப்பார்களா என இந்த நேரத்தில் எதையும் நான் உங்களுக்கு உறுதியளிக்க முடியாது” என்று கூறினார்.
