தமிழக வெற்றிக் கழகம் கட்சியின் முதல் மாநில மாநாடு 2024 அக்டோபர் 27-ல் விக்கிரவாண்டியில் நடந்தது. இரண்டாவது மாநில மாநாடு மதுரையில் கடந்த ஆகஸ்ட் 21-ல் நடந்தது. அதன்பின், செப்டம்பர் 13-ல் திருச்சியில் தனது தமிழக சுற்றுப் பயணத்தைத் தொடங்கினார் விஜய். டிசம்பர் 20 வரை 38 மாவட்டங்களிலும் அவர் பிரச்சார சுற்றுப் பயணம் மேற்கொள்கிறார். தனது சுற்றுப் பயண தொடக்கம் பற்றிய விமர்சனங்கள் வலுத்த நிலையில், “யார் எத்தனைக் கூப்பாடு போட்டாலும், எப்படிக் கதறினாலும், எத்தகைய வெறுப்பைக் கக்கினாலும் நாம் முன்னேறிச் செல்வோம்” என்று விஜய் கூறியுள்ளார்.
விஜய் அரசியலின் மூன்று நிகழ்ச்சிகளுமே தமிழகத்தின் இரு பெரும் திராவிட இயக்கங்களுக்கும் கலக்கத்தை ஏற்படுத்தியிருக்கிறது என்பதை மறுக்க முடியாது என்று காரணங்கள் அடுக்கப்படுகின்றன. குறிப்பாக, திருச்சியில் விஜய்க்கு கூடிய கூட்டம் திமுக, அதிமுகவுக்கு மட்டுமல்ல, தமிழகத்தில் ‘காலூன்றி, வேரூன்றி’ என்று பேசிக் கொண்டிருக்கும் பாஜகவுக்கும் சிக்கல்தான் என்ற பார்வைகளும் முன்வைக்கப்படுகின்றன.
