விசிக உள்ளிட்ட சில கட்சிகள் ஒரு சட்டமன்றத் தொகுதிக்கு ஒரு மாவட்டச் செயலாளரை நியமித்து கட்சியை வளர்க்கலாமா என பேசிக்கொண்டிருக்கும் நிலையில், அதிமுக-வில் மாநில பொறுப்பில் உள்ள நிர்வாகிகள் சிலரே மாவட்டச் செயலாளர் பதவிகளையும் உடும்புப் பிடியாக பிடித்துக் கொண்டு தொங்குவதால் கட்சியின் வளர்ச்சி பாதிக்கப்படுவதாக அதிமுக-வினர் புலம்புகிறார்கள். அதுவும் திண்டுக்கல் மாவட்டத்தில் இந்தப் புலம்பல் சற்று சத்தமாகவே கேட்கிறது.
அதிமுக துணைப் பொதுச்செயலாளரான நத்தம் இரா.விசுவநாதன் திண்டுக்கல் கிழக்கு மாவட்டச் செயலாளராக இருக்கிறார். அதேபோல் திண்டுக்கல் மேற்கு மாவட்டச் செயலாளரான திண்டுக்கல் சி.சீனிவாசன் மாநில பொருளாளராக இருக்கிறார். முன்னாள் அமைச்சர்களான இவர்கள் இருவரும் இப்போது எம்எல்ஏ-க்களாகவும் இருக்கிறார்கள்.
