Suriya: "அன்று ரிசர்வேஷன் செய்ய க்யூ நின்றது" – சூர்யா ரசிகர்களுக்கு தாணு கொடுக்கும் சர்ப்ரைஸ் என்ன?

July 30, 2025
NewsEditor
Cinema
0

2003 ஆம் ஆண்டு ஆகஸ்ட் முதல் தேதி அன்றுதான் ‘காக்க காக்க’ படம் வெளியானது. இப்போது 22வது ஆண்டைக் கொண்டாடுகிறது. தாணுவின் தயாரிப்பில் சூர்யா, ஜோதிகா நடிப்பில் வெளியாகி வசூலைக் குவித்தது மட்டுமல்லாமல், பல மொழிகளிலும் இந்தப் படம் ரீமேக் செய்யப்பட்டு அங்கும் வெற்றியைக் குவித்தது.

இந்தப் படத்தை விரைவில் ரீரிலீஸ் செய்கிறார் தயாரிப்பாளர் தாணு. சூர்யாவின் திரைப்பயணத்தில் திருப்புமுனையை ஏற்படுத்திய படம் இது. இதற்கு முன் ‘உயிரில் கலந்தது’, ‘மௌனம் பேசியதே’ என மென்மையான கதைகளில் நடித்து வந்த சூர்யாவை ஆக்‌ஷன் மோடிற்குத் திருப்பிவிட்ட படம் ‘காக்க காக்க’ தான்.

பாலாவின் ‘நந்தா’வைப் பார்த்த கௌதம் மேனன், தன்னுடைய அன்புச்செல்வன் ஐபிஎஸ், சூர்யாதான் எனக் கண்டு கொண்டு, ‘காக்க காக்க’வில் நடிக்க வைத்தார்.

காக்க காக்க

இது குறித்து தயாரிப்பாளர் தாணுவிடம் பேசினோம்.

”’காக்க காக்க’ ட்ரென்ட் செட்டை ஏற்படுத்தின படம்னு சொல்லலாம். இந்தப் படம் வெளியான அன்று ரிசர்வேஷன் செய்ய, மவுண்ட் ரோட்டில் தேவி பாரடைஸ் தியேட்டரில் இருந்து சாந்தி தியேட்டர் வரை மிகப்பெரிய க்யூ நின்றது இன்னமும் நினைவில் இருக்கிறது.

ஏசிபி அன்புச்செல்வன் ஐபிஎஸ் ஆக சூர்யா நடித்திருந்தார். காவல் துறையின் மீது மிகப்பெரிய மதிப்பையும், மரியாதையும் ஏற்படுத்திய படம். அன்புசெல்வன் போலக் கம்பீரமாகப் பெயரெடுக்க வேண்டும் என போலீஸில் பலரும் விரும்பினார்கள். அதைப் போல, இளைஞர்கள் பலரும் போலீஸில் சேரவேண்டும் என விரும்பினார்கள்.

இந்தப் படத்தை தெலுங்கில் வெங்கடேஷ் ‘gharshana’ என்ற பெயரில் ரீமேக் செய்திருந்தார். கௌதம் மேனனே இயக்கியிருந்தார். அதன் வெற்றி வெங்கடேஷிற்குப் பெரியதொரு ரீஎன்ட்ரியைக் கொடுத்தது. அதைப் போல இந்தியில் ‘force’ என்ற பெயரிலும், கன்னடத்தில் ‘dandam dashagunam’ என்ற பெயரிலும் ரீமேக் செய்யப்பட்டு, வெற்றி வாகை சூடியது.

இப்படிப் பல பெருமைகளைக் கொடுத்திருக்கும் ‘காக்க காக்க’வை ரீரிலீஸ் செய்யத் திட்டமிட்டு வருகிறோம். கமலின் ‘ஆளவந்தான்’, விஜய்யின் ‘சச்சின்’ படங்களை ரீரிலீஸ் செய்ததைத் தொடர்ந்து ‘காக்க காக்க’வையும் ரீரிலீஸ் செய்யும் வேலைகள் நடந்து வருகிறது. நவீனத் தொழில்நுட்பத்தில் வெளியிடுகிறோம். 22வது ஆண்டு ஸ்பெஷலாக வருகிற ஒன்றாம் தேதி இது குறித்த அறிவிப்பு ஒன்று வெளியாகிறது.” என்கிறார் தாணு.