பெங்களூரு: கர்நாடக முதல்வர் மாற்றப்படுகிறாரா என்ற கேள்விக்கு பதில் அளித்த கர்நாடக மாநிலத்துக்கான காங்கிரஸ் பொறுப்பாளர் ரந்தீப் சிங் சுர்ஜேவாலா, இதுபோன்ற விஷயங்களை கட்சி மேலிடம்தான் எடுக்கும் எனத் தெரிவித்துள்ளார்.
கர்நாடக முதல்வராக டி.கே.சிவக்குமார் விரைவில் பொறுப்பேற்பார் என அம்மாநில காங்கிரஸ் எம்எல்ஏக்கள் பலர் தொடர்ந்து கூறி வருகிறார்கள். இந்த விவகாரம் அம்மாநில அரசியலில் கடந்த சில வாரங்களாக முக்கிய பேசுபொருளாக மாறி இருக்கிறது. டி.கே.சிவக்குமார் டெல்லியில் உள்ள நிலையில், சித்தராமையா நாளை டெல்லி செல்ல இருக்கிறார். இந்நிலையில், கர்நாடக எம்எல்ஏக்கள் ஒவ்வொருவரையும் தனித்தனியாக சந்திக்கும் நோக்கில் சுர்ஜேவாலா பெங்களூருக்கு விரைந்துள்ளார்.
