இந்தூர்: மத்திய பிரதேச மாநிலம் இந்தூரின் துகோகஞ்ச் பகுதியைச் சேர்ந்தவர் நந்தினி சிப்லங்கர் (80). இவர் பள்ளியில் பணியாற்றி ஓய்வு பெற்றுள்ளார். இவரை 2 நாட்கள் டிஜிட்டல் அரஸ்ட் செய்து ரூ.1.02 கோடியை மோசடி கும்பல் பறித்துள்ளது. இதுகுறித்து இந்தூர் குற்றப் பிரிவு டிசிபி ராஜேஷ் தண்டோதியா நேற்று கூறியதாவது:
கடந்த மே 27-ம் தேதி மர்ம நபர்கள் சிலர் நந்தினி சிப்லங்கரை மொபைல் போனில் தொடர்பு கொண்டு பேசியுள்ளனர். அப்போது மும்பை கொலாபா போலீஸ் என்றும் சிபிஐ அதிகாரிகள் என்றும் தங்களை அறிமுகப்படுத்தி கொண்டுள்ளனர். மேலும், ஜெட் ஏர்வேஸ் நிறுவனர் நரேஷ் கோயலுடன் நந்தினி பணப் பரிவர்த்தனை வைத்துள்ளதாகவும், சட்டவிரோத பணப் பரிவர்த்தனையில் ஈடுபட்டுள்ளதாகவும் மர்ம நபர்கள் கூறியுள்ளனர்.
