சென்னை: பாமக நிறுவனர் ராமதாஸ் இதய பரிசோதனைக்காக சென்னை அப்போலோ மருத்துவமனையில் கடந்த 5-ம் தேதி அனுமதிக்கப்பட்டார். இதுபற்றி தகவல் அறிந்த முதல்வர் மு.க.ஸ்டாலின் நேற்று மருத்துவமனைக்குச் சென்று, அவரை சந்தித்து நலம் விசாரித்தார்.
இதேபோல் காய்ச்சல், சளி, இருமல் பிரச்சினைக்காக இதே மருத்துவமனையில் சிகிச்சை பெற்றுவரும் மதிமுக பொதுச்செயலாளர் வைகோவின் குடும்பத்தினரையும் சந்தித்து ஸ்டாலின் நலம் விசாரித்தார். அப்போது அமைச்சர்கள் கே.என்.நேரு, எ.வ.வேலு உடன் இருந்தனர். முன்னதாக, காலையில் மருத்துவமனைக்கு வந்த ராமதாஸ் மகனும், பாமக தலைவருமான அன்புமணி, மருத்துவர்களை சந்தித்து உடல்நிலை குறித்தும், அளிக்கப்படும் சிகிச்சைகள் பற்றியும் கேட்டறிந்தார்.
