கோவில்பட்டியில் அதிமுக தகவல் தொழில்நுட்பப் பிரிவு சார்பில் பாக முகவர்களுக்கான பயிற்சி முகாம் நடந்தது. நகர அதிமுக செயலாளர் விஜய பாண்டியன் தலைமை வகித்தார்.
கடம்பூர் செ.ராஜூ எம்எல்ஏ பேசியதாவது: கோவில்பட்டி சட்டப்பேரவை தொகுதி வரலாற்றில் இதுவரை ஒருமுறை கூட திமுக வெற்றி பெற்றதே இல்லை. கோவில்பட்டியில் எந்த காலத்திலும் திமுக வெற்றி பெறாது. கடந்த 10 ஆண்டு கால அதிமுக ஆட்சியில் கோவில்பட்டி தொகுதிக்கு ஏராளமான திட்டங்கள் கொண்டு வரப்பட்டுள்ளன. சிற்பங்களில் சிறந்து விளங்கக் கூடிய கழுகு மலையை புராதன நகராக அறிவித்து, 2013ம் ஆண்டிலேயே அதன் வளர்ச்சிக்காக ரூ.1 கோடி நிதி ஒதுக்கப்பட்டது. 100 சதவீதம் போக்குவரத்து வசதியை உறுதி செய்த ஒரே தொகுதி, தமிழகத்திலேயே கோவில்பட்டி தொகுதி மட்டும் தான்.
