சென்னை: தமிழக காவல் துறையின் புதிய டிஜிபியை தேர்வு செய்வதற்கான ஆலோசனைக் கூட்டம் வரும் 26-ம் தேதி டெல்லியில் நடைபெற வாய்ப்புள்ளதாக தகவல் வெளியாகி உள்ளது. தமிழக காவல் துறையின் சட்டம்- ஒழுங்கு டிஜிபியாக இருந்த சங்கர் ஜிவால் கடந்த மாதம் 31-ம் தேதியுடன் பணிஓய்வு பெற்றார்.
அடுத்த டிஜிபியாக சீமா அகர்வால், ராஜீவ் குமார், சந்தீப்ராய் ரத்தோர் ஆகிய 3 பேரில் ஒருவர் நியமிக்கப்பட வாய்ப்பு உள்ளதாக கருதப்பட்டது. ஆனால், யாரும் எதிர்பாராத வகையில் அவர்களுக்கு ஜூனியரான நிர்வாகப் பிரிவு டிஜிபி வெங்கடராமன், கூடுதலாக சட்டம் – ஒழுங்கு டிஜிபி பணியை கவனிப்பார் என உள்துறை செயலாளர் தீரஜ்குமார் அறிவிப்பு வெளியிட்டார்.
