உலகக் குத்துச்சண்டை போட்டி; தங்கம் வென்ற ஜாஸ்மின், மினாக்ஷி – குவியும் வாழ்த்துக்கள்

September 15, 2025
NewsEditor
General
0

உலக குத்துச்சண்டை போட்டியின் மகளிர் 57 கிலோ எடை பிரிவில் இந்திய வீராங்கனை ஜாஸ்மின் லம்போரியா, தங்கம் வென்று அசத்தி இருக்கிறார்.

இங்கிலாந்தின் லிவர்பூல் நகரில் உலக குத்துச்சண்டை போட்டி நடைபெற்று வருகிறது.

நேற்று (செப்.15) நடைபெற்ற 57 கிலோ பிரிவு போட்டியில் இந்தியாவின் ஜாஸ்மினும், போலந்தின் ஜூலியா ஸ்செரெமெட்டாவும் மோதினர்.

இதில் ஜாஸ்மின் லம்போரியா 4-1 என்ற கணக்கில் போலந்து வீராங்கனை ஜூலியாவை வீழ்த்தினார்.

ஜாஸ்மின் லம்போரியா

இதன்மூலம் உலக குத்துச்சண்டை போட்டியில் தங்கம் வென்ற 9-வது இந்திய வீராங்கனை என்ற பெருமையை ஜாஸ்மின் பெற்றிருக்கிறார்.

இதற்கு முன்பு இந்திய வீராங்கனைகள் மேரி கோம் 6 முறையும், நிகத் ஜரீன் 2 முறையும், சரிதா தேவி, ஜென்னி, லேகா, நிது கங்காஸ், லாவ்லினா போர்கோஹெய்ன், சவிதா பூரா ஆகியோர் தலா ஒரு முறையும் உலக குத்துச்சண்டை போட்டியில் தங்கம் வென்றுள்ளனர்.

தனது 3-வது உலக சாம்பியன்ஷிப் போட்டியிலேயே 24 வயதான ஜாஸ்மின் தங்கம் வென்று சாதித்து இந்தியாவை பெருமை அடையச் செய்திருக்கிறார்.

அதேபோல மகளிர் 48 கிலோ பிரிவில் இந்திய வீராங்கனை மினாக்ஷியும், கஜகஸ்தான் வீராங்கனை நஸிம் கியாஜாய்பேவும் மோதினர்.

இதில் மினாக்ஷி 4-1 என்ற கணக்கில் நஸிமை வீழ்த்தி தங்கம் வென்றிருக்கிறார்.

தவிர 80 கிலோவுக்கு மேற்பட்ட பிரிவில் நூபுரும், போலந்து வீராங்கனை அகதா காஸ்மார்ஸ்காவும் மோதினர்.

இதில் அகதா காஸ்மார்ஸ்கா 3-2 என்ற கணக்கில் நூபுரை வீழ்த்தி தங்கம் வென்றிருக்கிறார். இதையடுத்து நூபுருக்கு வெள்ளிப் பதக்கம் கிடைத்தது.

மகளிர் 80 கிலோ பிரிவு போட்டியில் மற்றொரு இந்திய வீராங்கனை பூஜா வெண்கலத்தைக் கைப்பற்றி இருக்கிறார். அரை இறுதியில் பூஜா, இங்கிலாந்து வீராங்கனை எமிலி அஸ்கித்திடம் 1-4 என்ற கணக்கில் தோல்வி அடைந்தார். இதையடுத்து அவருக்கு வெண்கலப் பதக்கம் கிடைத்தது.

போட்டியின் முடிவில் இந்தியாவுக்கு 4 பதக்கங்கள் கிடைத்துள்ளன. பதக்கங்களை வென்ற சிங்கப் பெண்களுக்கு பலரும் வாழ்த்துகளைத் தெரிவித்து வருகின்றனர்.