Lokah: லோகா யூனிவர்ஸில் இணையும் `மலையாள சூப்பர் ஸ்டார்'; இயக்குநரின் அதிகாரப்பூர்வ அறிவிப்பு!

September 7, 2025
NewsEditor
General
0

பல பெரிய பட்ஜெட் படங்கள் ஓடிக்கொண்டிருக்கும் நேரத்தில், நடுத்தர பட்ஜெட்டில் பெண்களை மையமாக வைத்து எடுக்கப்பட்ட சூப்பர் ஹீரோ படமான ‘லோகா சாப்டர் 1: சந்திரா’ மலையாளத்தைத் தாண்டி இந்தியா முழுவதும் வெற்றிகரமாக ஓடிக்கொண்டிருக்கிறது.

டோமினிக் அருண் இயக்கத்தில், மலையாள சூப்பர்ஸ்டார் துல்கர் சல்மான் தயாரித்து, கல்யாணி பிரியதர்ஷன் நடித்த இந்த மலையாள படம், இந்தியாவின் சிறந்த சூப்பர் ஹீரோ படங்களில் ஒன்றாகப் பாராட்டப்படுகிறது.

லோகா சாப்டர் 1

படத்தின் முடிவில் வரும் போஸ்ட் கிரெடிட் காட்சியில் டோவினோ தாமஸ், துல்கர் சல்மான் தோன்றுகின்றனர். அதன் மூலம் லோகா சாப்டர் 2-க்கான எதிர்பார்ப்பை அதிகரித்துள்ளது.

சமீபத்தில் தமிழ்நாட்டில் செய்தியாளர்களை சந்தித்த லோகா திரைப்படத்தின் தயாரிப்பாளரும், நடிகருமான துல்கர் சல்மான், இந்தப் படம் 5 பாகம் வரை வரும் என நம்புவதாக தெரிவித்திருந்தார்.

அதன் அடிப்படையில், அடுத்த பாகத்துக்கான கதை விவாதத்தில் இருப்பதாகவும் தெரிவித்திருந்தார்.

இந்த நிலையில், லோகா சாப்டர் 1 திரைப்படத்தின் இயக்குநர் டோமினிக் அருண் தன் இன்ஸ்டாகிராம் பக்கத்தில் நடிகர் மம்மூடிக்கு பிறந்தநாள் வாழ்த்து தெரிவித்திருக்கிறார். அந்த வாழ்த்துடன் நடிகர் மம்மூட்டி லோகா பட யூனிவர்ஸில் இணைந்திருப்பதையும் அறிவித்திருக்கிறார்.

யக்ஷியின் சக்திகள்

மலையாள நாட்டுப்புற கதைகளை நவீன கதைசொல்லலுடன் இணைத்து எடுக்கப்பட்ட இந்த படத்தில், கல்யாணி பிரியதர்ஷனின் ‘சந்திரா’ கதாபாத்திரம் ஸ்வீடனில் இருந்து பெங்களூருக்கு வந்து ‘யக்ஷி’ என்ற மாய சக்திகளைக் கண்டுபிடிக்கிறது.

மம்மூட்டி ‘மூத்தான்’ கதாபாத்திரத்திற்கு குரல் கொடுத்துள்ளார். எனவே லோகா யூனிவர்ஸில் முக்கிய நட்சத்திரங்கள் இணைந்திருப்பது எதிர்ப்பார்ப்பை அதிகரித்திருக்கிறது.