எம்.எல்.ஏ-வுக்கான ஓய்வூதியம் பெற விண்ணப்பித்துள்ள ஜக்தீப் தன்கர்; விவரம் என்ன?

August 31, 2025
NewsEditor
General
0

துணை குடியரசுத் தலைவராக இருந்த ஜெக்தீப் தன்கர், அவரின் பதவிக்காலம் 2027 ஆகஸ்ட் மாதம் வரை இருக்கும் நிலையில் திடீரென கடந்த ஜூலை 21 அன்று பதவியை ராஜினாமா செய்தார். ராஜினாமாவிற்கு அவரின் உடல் நிலையை காரணமாக சொல்லப்பட்டது.

ஆனால், எதிர்க்கட்சித் தலைவர்கள், எம்.பிக்கள் பலரும், ஜெக்தீப் தன்கர் ராஜினாமா செய்ய கட்டாயப்படுத்தப்பட்டதாக குற்றம் சாட்டுகின்றனர். மேலும் எதிர்க்கட்சிகள் அவர் எங்கே உள்ளார் என கேள்வி எழுப்பி வருகின்றனர்.

ஜக்தீப் தன்கர்

இந்நிலையில் ஜக்தீப் தன்கர் ராஜஸ்தான் சட்டப்பேரவையின் முன்னாள் உறுப்பினருக்கான ஓய்வூதியம் பெற விண்ணப்பித்துள்ளார் என்று தகவல்கள் வெளியாகியிருக்கிறது. ராஜஸ்தான் சட்டப்பேரவைச் செயலாளரகம் அவரது விண்ணப்பத்தை ஏற்றுக்கொண்டுள்ளதாகவும், விரைவில் ஓய்வூதியம் வழங்கப்படும் என்றும் தெரிவித்திருக்கிறது.

ராஜஸ்தான் மாநிலத்தின் கிஷன்கர் தொகுதியின் காங்கிரஸ் எம்.எல்.ஏ.வாக 1993 முதல் 1998 வரை இருந்தவர் ஜக்தீப் தன்கர். 2019 ஜூலை மாதம் வரை அவர் சட்டமன்ற உறுப்பினருக்கான ஓய்வூதியத்தைப் பெற்றுவந்தார். அவர் மேற்கு வங்காள மாநில ஆளுநராக நியமிக்கப்பட்ட பிறகு அந்த ஓய்வூதியம் தற்காலிகமாக நிறுத்தப்பட்டது.

கடந்த ஜூலை 21-ஆம் தேதி துணைத் தலைவராக இருந்த பதவியிலிருந்து விலகியதையடுத்து, தன்கர் தற்போது தனது ஓய்வூதியத்தை மீண்டும் வழங்குமாறு ராஜஸ்தான் சட்டப்பேரவைச் செயலாளரகத்திடம் கேட்டுக் கொண்டுள்ளார். அதன்படி, அவரது ஓய்வூதியத்தை மீண்டும் வழங்கும் செயல்முறை தொடங்கியுள்ளதாகவும், துணைத் தலைவராக இருந்த பதவியிலிருந்து விலகிய தேதி முதல் அவருக்கான ஓய்வூதியம் வழங்கப்படும் என்று கூறப்படுகிறது.

தன்கருக்கு ஓய்வூதியம் எவ்வளவு தெரியுமா?

ராஜஸ்தானில், ஒரு முறை சட்டமன்ற உறுப்பினராக இருந்தவருக்கு மாதம் ரூ.35,000 அடிப்படை ஓய்வூதியம் வழங்கப்படுகிறது. 70 வயதுக்கு மேற்பட்டவர்களுக்கு 20 சதவீத கூடுதலாக வழங்கப்படும். அதன்படி தற்போது 74 வயதில் உள்ள தன்கர், மாதம் ரூ.42,000 ஓய்வூதியத்துக்கு தகுதி பெறுவார்.

இதுதவிர ஒருமுறை லோக்சபா எம்.பி. ஆக இருந்ததற்காக மாதம் ரூ.45,000 பெறுவதற்கு அவர் உரிமை பெற்றுள்ளார். முன்னாள் குடியரசுத் துணைத் தலைவர் என்ற முறையில், அவர் மாதம் சுமார் ரூ.2 லட்சம் பெறுவதோடு, அதிகாரப்பூர்வ இல்லம், ஊழியர்கள், மற்றும் மருத்துவ வசதிகளையும் பெற முடியும்.