சேலம்: இந்திய கம்யூனிஸ்ட் கட்சியின் 4 நாள் மாநில மாநாடு சேலத்தில் இன்று தொடங்குகிறது. வரும் 18-ம் தேதி வரை நடைபெறவுள்ள இம்மாநாட்டில் நாளை (ஆக. 16) நடைபெறும் நிகழ்ச்சியில் முதல்வர் ஸ்டாலின் மற்றும் கூட்டணிக் கட்சித் தலைவர்கள் பங்கேற்கின்றனர். சேலம் பழைய பேருந்து நிலையம் அருகேயுள்ள நேரு கலையரங்கில் இன்று மூத்த தலைவர் இரா.நல்லகண்ணு, முன்னாள் எம்எல்ஏ பழனிசாமி ஆகியோர் மாநாட்டுக் கொடியேற்றி வைக்கின்றனர்.
தேசியப் பொதுச் செயலாளர் டி.ராஜா தொடக்க உரையாற்றுகிறார். தொடர்ந்து, அமர்ஜித் கவுர், டாக்டர் கே.நாராயணா, ஆனி ராஜா, சி.எச்.வெங்கடாசலம், டி.எம்.மூர்த்தி உள்ளிட்ட தலைவர்கள் பேசுகின்றனர். நாளை மாலை மாநிலச் செயலாளர் இரா.முத்தரசன் தலைமையில் ‘வெல்க ஜனநாயகம்’ என்ற தலைப்பிலான எழுச்சி மாநாடு தொடங்குகிறது. இதில் முதல்வர் ஸ்டாலின் பங்கேற்று நிறைவுரையாற்றுகிறார்.
