Beauty: சருமம் பளபளப்பா இருக்க வீட்டுக்குள்ள ஒரு பியூட்டி பார்லர்!

August 6, 2025
NewsEditor
General
0

கிட்டத்தட்ட எல்லா சீசனிலும் வெயிலடிக்கிறது. திடீரென இரவில் மழை பெய்கிறது. காலையிலோ சுளீரென வெயில் காய்கிறது. அதில் இருந்து இயற்கையான முறையில் சருமத்தை எப்படிக் காப்பது என சொல்கிறார் சித்த மருத்துவர் தமிழ்க்கனி.

Beauty

* வீட்டைவிட்டு வெளியே செல்வதற்கு முன்னர் வெயில்படும் இடங்களில் குறிப்பாக கை, கால்களில் செக்கில் ஆட்டிய தேங்காய் எண்ணெயை லேசாக தேய்த்துக்கொள்ளலாம். இது புற ஊதாக் கதிர்களின் பாதிப்பிலிருந்து சருமத்தைப் பாதுகாக்கும்.

* உடலில் வெயில்படும் இடங்களில் எலுமிச்சைச் சாற்றுடன் தேன் சேர்த்து, ஒரு மணி நேரம் ஊறவைத்துக் கழுவ வேண்டும். இது சிறந்த கலரிங் ஏஜென்ட்டாகச் (Coloring Agent) செயல்படும். சருமத்தில் எண்ணெய்ப் பிசுபிசுப்பை நீக்கும்; நிற மாற்றத்தைச் சரிசெய்யும்.

* பப்பாளி, வாழைப்பழம் ஆகியவற்றைத் தோல் நீக்கி, சதைப் பகுதியை மட்டும் விழுதாக அரைத்து ஒருநாள்விட்டு ஒருநாள் ஃபேஸ் பேக்காகப் பயன்படுத்தலாம். இதிலுள்ள கரோட்டினும், வைட்டமின் சத்துகளும் சருமத்தை மிருதுவாக்கும்.

* தக்காளி, கடலை மாவு, சந்தனத்தை பேஸ்ட் ஆக்கி, காலை நேரத்தில் ஃபேஸ் பேக்காக அப்ளை செய்வது சரும வறட்சியைத் தடுக்கும். இதில் சந்தனம் உடலுக்குக் குளிர்ச்சியைக் கொடுக்கும்; கடலை மாவு, இறந்த செல்களை நீக்கும்; தக்காளி, சிறந்த கலரிங் ஏஜென்ட்டாகச் செயல்படும். ஆகவே இவற்றை மொத்தமாகச் சேர்த்துப் பயன்படுத்தலாம்; தனித்தனியாகவும் பயன்படுத்தலாம்.

* சூரியனின் கதிர்களால் சிலருக்கு சருமத்தில் கருமை படரும். இதை `சன் டேனிங்’ என்பார்கள். இந்தப் பிரச்னைக்கு வெள்ளரிக்காய், தக்காளி, உருளைக்கிழங்கு போன்றவற்றைத் துண்டு துண்டாக நறுக்கி, நிறம் மாறிய பகுதிகளில் வைக்கவும். மூன்றையும் ஒரே நாளில் பயன்படுத்தாமல் ஒருநாள் தக்காளி, மறுநாள் வெள்ளரி என மாற்றிப் பயன்படுத்துவது நல்லது.”