“என்னுடைய கிரஷ்; அவருக்கு லெட்டார்லாம் போட்டேன்" – பாலிவுட் நடிகர் குறித்து எம்.பி மஹுவா மொய்த்ரா

August 5, 2025
NewsEditor
Cinema
0

மேற்கு வங்க எம்.பி மஹுவா மொய்த்ரா நாடாளுமன்றத்தில் உரையாற்றுகிறார் என்றால், தன்னுடைய ஆக்ரோஷமான பேச்சால் பெரும்பாலான எம்.பி-களின் கவனத்தை தன் பக்கம் திருப்பிவிடுவார்.

அதே நேரம் சமூக ஊடகங்களிலும், தனிப்பட்ட பேட்டிகளிலும் நகைச்சுவையாகவும், வெளிப்படையாகவும் பேசக்கூடியவர். சமீபத்தில் தனியார் செய்தி நிறுவனம் நடத்திய நேர்காணல் ஒன்றில், உங்களுக்குப் பிடித்த பாலிவுட் நடிகர் யார்? எனக் கேட்கப்பட்டது.

பங்கஜ் திரிபாதி

அதற்கு சிரித்துக்கொண்டே பதிலளித்த எம்.பி மஹுவா மொய்த்ரா, “எனக்கு பாலிவுட் நடிகர்களில் பங்கஜ் திரிபாதியை பயங்கரமா பிடிக்கும். என்னுடைய கிரஷ்னு கூட சொல்லலாம். அவருக்கு நான் லெட்டர் எழுதி அனுப்பியிருக்கேன். அந்த லெட்டர்ல ‘உங்களை ரொம்ப பிடிக்கும். உங்க கூட ஒரு காபி சாப்பிடனும். எப்போ சந்திக்கலாம்’-னு எழுதியிருந்தேன்.

ஆனால் அவர் என் லெட்டர்-க்கு எந்த பதிலும் எழுதல. ஒருமுறை அவரை நேர்காணல் செய்யவிருந்த தொகுப்பாளர் மூலமும் இந்த செய்தியை அவருக்குச் சொல்லச் சொன்னேன். ஆனால், அவர் ரசிகர்களை தனிப்பட்ட முறையில் சந்திப்பதில்லைனு என்னிடம் சொன்னார்கள். அதனால் நான் எதிர்பார்த்த சந்திப்பு நடக்கவே இல்லை. அப்படியும் நான் விடலையே, அவரின் மீதான் அபிமானம் மிகவும் ஆழமானது. ஒருமுறை நடிகரும், நாடாளுமன்ற உறுப்பினருமான ரவி கிஷன் மூலம் அவரிடம் பேச முயன்றேன்.

ரவி கிஷன் பங்கஜ் திரிபாதியுடன் தொலைபேசியில் பேசுவதற்கு ஏற்பாடு செய்தார். ஆனால், அந்த உரையாடலின்போது என்ன பேசுவதென்றே தெரியாமல் அதிர்ச்சியில் இருந்தேன். அவருக்கு நான் எழுதி அனுப்பிய கடிதத்தைக் கூட அவர் மறந்துவிட்டார்.” என வெட்கம் பரவ பேசி முடித்தார்.

நியூட்டன், ஸ்ட்ரீ, மிமி, மிர்சாபூர் போன்ற ஹிட் படங்கள் மூலம் தனக்கென தனி ரசிகர் பட்டாளத்தை வைத்திருக்கும் பங்கஜ் திரிபாதி தலைமுறைகள் கடந்தும் தனக்கான பட்டாளத்தை உருவாக்கிக்கொண்டிருக்கிறார்.