“பெண்கள் நள்ளிரவில் வெளியே செல்லாமல் இருந்தால்…" – சர்ச்சையான காவல்துறையின் அறிவிப்பு

August 3, 2025
NewsEditor
General
0

குஜராத் மாநிலத்தில் பூபேந்திர் படேல் தலைமையிலான பா.ஜ.க ஆட்சி செய்து வருகிறது. குஜராத் மாநில காவல்துறை பெண்கள் பாதுகாப்பு தொடர்பாக ஒட்டியிருக்கும் சுவரொட்டிகள் சர்ச்சையை ஏற்படுத்தியிருக்கிறது.

சோலா, சந்த்லோடியா பகுதிகளில் உள்ள சாலை தடுப்புகளில் ஒட்டப்பட்டிருக்கும் சுவரொட்டிகளில், “பெண்களே நள்ளிரவு விருந்துகளில் கலந்து கொள்ளாதீர்கள். நீங்கள் பாலியல் வன்கொடுமையோ அல்லது கூட்டு பாலியல் வன்கொடுமையோ செய்யப்படலாம்” , “உங்கள் நண்பர்களுடன் இருண்ட, தனிமைப்படுத்தப்பட்ட பகுதிகளுக்குச் செல்லாதீர்கள். தனிமையில் உங்களை பாலியல் வன்கொடுமை செய்தால் என்ன செய்வீர்கள்?” போன்ற கேள்விகள் அதில் இடம்பிடித்திருந்தன.

குஜராத் முதல்வர் பூபேந்திர படேல்

இந்த சுவரொட்டிகள் சமூக ஊடகங்களில் பரவி கடும் விமர்சனங்களை சந்தித்திருக்கிறது. இந்த விவகாரம் தொடர்பாக விளக்கமளித்த காவல்துறை தரப்பு, “சதார்க்தா குழுமம் ஒரு தன்னார்வ தொண்டு நிறுவனம். இந்த நிறுவனம் எங்களை அணுகி, பள்ளிகள் மற்றும் கல்லூரிகளில் போக்குவரத்து விழிப்புணர்வு நிகழ்ச்சிகளை நடத்த விரும்புவதாகவும், காவல்துறை அதிகாரிகளை அதற்கு ஒத்துழைக்குமாறும் கேட்டது. போக்குவரத்து விழிப்புணர்வு தொடர்பான சுவரொட்டிகள் எங்களுக்குக் காட்டப்பட்டன.

ஆனால் இதுபோன்ற சர்ச்சைக்குரிய சுவரொட்டிகள் எங்களுக்குக் காட்டப்படவில்லை. மேலும் எங்கள் அனுமதியின்றியே அந்த சுவரொட்டிகள் ஒட்டப்பட்டிருக்கின்றன. புகார் வந்தற்குப் பிறகு அந்த சுவரொட்டிகளை அகற்றிவிட்டோம்.” என்றார். இந்த விவகாரம் தொடர்பாக பேசிய குஜராத் ஆம் ஆத்மி கட்சி, “குஜராத்தில் உள்ள பா.ஜ.க அரசு பெண்களுக்கு அதிகாரமளிப்பது பற்றிப் பேசுகிறது. ஆனால் கள யதார்த்தம் முற்றிலும் வேறுபட்டது.

கடந்த மூன்று ஆண்டுகளில், குஜராத்தில் 6,500க்கும் மேற்பட்ட பாலியல் வன்கொடுமை சம்பவங்களும் 36-க்கும் மேற்பட்ட கூட்டு பாலியல் வன்கொடுமைகளும் நடந்துள்ளன. ஒரு நாளைக்கு ஐந்துக்கும் மேற்பட்ட பாலியல் வன்கொடுமைகள் பதிவு செய்யப்படுகிறது. முதலமைச்சரும் பா.ஜ.க தலைவர்களும் பெண்கள் பாதுகாப்பு பற்றிப் பேசுகிறார்கள். ஆனால் இன்று அகமதாபாத் போன்ற ஒரு பெரிய நகரத்தில், இந்த சுவரொட்டிகள் குஜராத்தின் யதார்த்தத்தை வெளிப்படுத்துகின்றன. குஜராத் பெண்கள் இரவில் வீட்டை விட்டு வெளியே செல்ல வேண்டுமா இல்லையா என்பதுதான் முதல்வரிடம் எங்கள் கேள்வி?” என்றார்.