கூட்டணிக்கான எடப்பாடி பழனிசாமியின் அழைப்பை சட்டென மறுத்திருக்கிறது விஜய், சீமான் தரப்பு. திமுகவுக்கு எதிராக பலம் வாய்ந்த கூட்டணியை அமைக்க முயலும் அதிமுகவின் முயற்சிக்கு முதற்கட்ட பின்னடைவாக இது அமைந்துள்ளது. தவெக, நாதகவை வழிக்கு கொண்டுவர இபிஎஸ்சின் அடுத்தக்கட்ட முன்னெடுப்பு என்னவாக இருக்கும் என பார்ப்போம்.
ஜெயலலிதா மறைவுக்குப் பின்னர் எடப்பாடி பழனிசாமியின் கை ஓங்கியதிலிருந்து, சந்தித்த தேர்தல்கள் அனைத்திலும் பின்னடைவை சந்தித்து வருகிறது அதிமுக. அந்த வகையில் 2026 தேர்தலில் வெற்றிபெற்றே ஆகவேண்டிய நெருக்கடியோடு களமிறங்கியிருக்கிறார் இபிஎஸ். ஆனால், அவரின் கூட்டணியில் இப்போதுள்ள கட்சிகள் பாஜகவும், தமாகாவும்தான். எனவே, இன்னும் சில கட்சிகளை உள்ளே கொண்டுவந்து கூட்டணியை வலுப்படுத்த தீவிர முயற்சிகளில் இறங்கியுள்ளார்.
