பூமி இன்று வழக்கத்தை விட சற்று வேகமாக சுழல்கிறது என்று விஞ்ஞானிகள் கூறுகின்றனர். இதனால், இன்றைய நாள் வழக்கமான 24 மணி நேரத்தை விட 1.34 மில்லி வினாடிகள் குறைவாக இருக்கும் என்று கூறுகின்றனர்.
இது 2025ஆம் ஆண்டின் இரண்டாவது குறுகிய நாளாக கருதப்படுகிறது. இதற்கு முன்பு ஜூலை 10 அன்று, பூமி 1.36 மில்லி வினாடிகள் குறைவாக சுழன்று, இந்த ஆண்டின் மிகக் குறுகிய நாளாக பதிவு செய்யப்பட்டது.
பூமியின் சுழற்சி வேகத்தில் ஏற்படும் இந்த சிறிய மாற்றங்கள், பூமியின் உள்ளே நடக்கும் மாற்றங்களைக் குறிக்கின்றன. பூமியின் உள் மையம், கடல் நீரோட்டங்கள், வளிமண்டல மாற்றங்கள் போன்றவை இந்த வேக மாற்றத்திற்கு காரணமாக இருக்கலாம் என்று விஞ்ஞானிகள் கூறுகின்றனர்.
பூமி ஏன் வேகமாக சுழல்கிறது?
2023ஆம் ஆண்டு Paleoceanography and Paleoclimatology இதழில் வெளியான ஆய்வின்படி, பல பில்லியன் ஆண்டுகளுக்கு முன்பு பூமியின் ஒரு நாள் 19 மணி நேரமாக மட்டுமே இருந்தது. சூரியனும் சந்திரனும் பூமியின் கடல்கள் மற்றும் வளிமண்டலத்தின் மீது ஏற்படுத்திய ஈர்ப்பு விசையால் இது நிகழ்ந்தது.
பொதுவாக, சந்திரன் பூமியிலிருந்து மெதுவாக விலகுவதால், பூமியின் சுழற்சி வேகம் குறையும். ஆனால், தற்போது பூமியின் உள் மைய இயக்கங்கள், கடல் நீரோட்டங்கள் மற்றும் வளிமண்டல மாற்றங்கள் பூமியை சற்று வேகமாக சுழல வைக்கின்றன என்று விஞ்ஞானிகள் கணிக்கின்றனர்.
இதனால் என்ன நடக்கும்?
பூமியின் சுழற்சி வேகம் தொடர்ந்து அதிகரித்தால், 2029ஆம் ஆண்டுக்குள் நமது அணு கடிகாரங்களில் ஒரு வினாடியை குறைக்க வேண்டிய நிலை ஏற்படலாம். இது நேரக் கணக்கீட்டில் ஒரு முக்கிய மாற்றமாக இருக்கும் என்று கூறுகின்றனர்.
மற்றொரு குறுகிய நாள் வருமா?
2025ஆம் ஆண்டில் ஜூலை 10, ஜூலை 22 மற்றும் ஆகஸ்ட் 5 ஆகிய நாட்கள் மிகக் குறுகிய நாட்களாக இருக்கும் என்று விஞ்ஞானிகள் முன்னறிவித்தனர்.
தற்போதைய தரவுகளின்படி, ஜூலை 10 மிகக் குறுகிய நாளாகவும், இன்று (ஜூலை 22) இரண்டாவது குறுகிய நாளாகவும் இருக்கிறது. இந்த சிறிய மாற்றங்களை நாம் உணர முடியாவிட்டாலும், விஞ்ஞானிகள் இதை உன்னிப்பாக கண்காணித்து வருகின்றனர்.
