அண்ணா அறிவாலயத்தில் அன்வர் ராஜா… கட்சியில் இருந்து நீக்கிய அதிமுக! – தகிக்கும் அரசியல் களம்

July 21, 2025
NewsEditor
General
0

அதிமுகவின் முன்னாள் அமைச்சர் மற்றும் எம்.பி அன்வர் ராஜா. எம்.ஜி.ஆர் அதிமுகவை தொடங்கிய காலத்தில் இருந்தே, அந்தக் கட்சியில் இருக்கும் சீனியர் இவர்.

அன்வர் ராஜாவும், பாஜக உடனான கூட்டணியும்!

அடுத்த ஆண்டு தமிழ்நாட்டில் நடக்க உள்ள சட்டமன்ற தேர்தலுக்காக அதிமுகவும், பாஜகவும் கூட்டணி அமைத்துள்ளது.

இந்த நிலையில், அன்வர் ராஜா, இந்த மாதத்தில் முதல் வாரத்தில், “தமிழ்நாட்டில் பாஜக ஒருபோதும் காலூன்ற முடியாது என்பது எனது தனிப்பட்ட கருத்து” என்று கூறி, பரபரப்பை ஏற்படுத்தி இருந்தார்.

இது குறித்து, பாஜக உடன் அதிமுக கூட்டணி வைத்ததில், அன்வர் ராஜாவிற்கு விருப்பம் இல்லை என்று கூறப்பட்டது.

பாஜக – அதிமுக கூட்டணி

அண்ணா அறிவாலயத்தில் அன்வர் ராஜா

இந்தப் பரபரப்புகள் அடங்குவதற்கு முன்பே, இன்று அன்வர் ராஜா திமுகவில் இணைய அண்ணா அறிவாலயத்திற்கு வந்தார்.

இதனையடுத்து, அதிமுகவில் இருந்து அன்வர் ராஜாவை நீக்குவதாக அதிமுக பொது செயலாளர் எடப்பாடி பழனிசாமி அறிவித்துள்ளார்.

அன்வர் ராஜாவை அதிமுகவில் இருந்து நீக்குவது இது முதல்முறையல்ல.

2021-ம் ஆண்டும்…

2021-ம் ஆண்டு நடைபெற்ற தமிழ்நாடு சட்டமன்றத் தேர்தலில், 66 இடங்களை மட்டுமே கைப்பற்றி, ஆட்சியை தி.மு.க-விடம் இழந்தது அ.தி.மு.க.

இந்தத் தோல்விக்குக் காரணம் அ.ம.மு.க உருவானதும், பா.ஜ.க-உடனான கூட்டணி எனப் பல கருத்துகள் முன்வைக்கப்பட்டன.

குறிப்பாக, முன்னாள் அமைச்சர்களான சி.வி.சண்முகம், ஜெயக்குமார் உள்ளிட்டோர் தங்களின் தோல்விக்கு பாஜக-வுடனான கூட்டணிதான் முக்கியக் காரணம் எனத் தெரிவித்தனர்.

அதே கருத்தை, அதிமுக சீனியரான அன்வர் ராஜாவும் முன்வைத்தார். ஆனால், அதோடு நிற்காமல், தலைமை குறித்து கடுமையான விமர்சனம் வைத்ததோடு, சசிகலாவை மீண்டும் கட்சிக்குள் கொண்டுவர வேண்டும் என்று கருத்து தெரிவித்தார்.