சென்னை: நூறாவது வயதில் அடியெடுத்து வைத்திருக்கும் காந்திய போராளி கிருஷ்ணம்மாள் ஜெகநாதனுக்கு மக்கள் நீதி மய்யம் தலைவர் கமல்ஹாசன் வாழ்த்து தெரிவித்துள்ளார். தாழ்த்தப்பட்ட மக்களின் நலனுக்காக தன் வாழ்க்கையை அர்ப்பணித்தவரும், காந்திய போராளியுமான கிருஷ்ணம்மாள் ஜெகநாதன் நேற்று 100-வது வயதில் அடியெடுத்து வைத்தார். இதை யொட்டி அவருக்கு மநீம தலைவர் கமல்ஹாசன் பிறந்தநாள் வாழ்த்து தெரிவித்துள்ளார்.
இது தொடர்பாக சமூக வலைதளத்தில் கமல் ஹாசன் நேற்று வெளியிட்ட வாழ்த்துச் செய்தியில் கூறியிருப்பதாவது: காந்தியம் என்னும் கருத்தாக்கத்துக்கு உருவமாய் இன்று நம் கண்முன் நிற்கும் பெருந்தகையாளர் கிருஷ்ணம்மாள் ஜெகநாதன். சட்டரீதியான போராட்டங்களால், செயல்பாடுகளால் லட்சக்கணக்கான எளிய மக்களுக்கு வாழ்வாதாரம் பெற்றுத் தந்த காந்தியர்.
