"திருமா அண்ணன் எப்போ மீசையை முறுக்கிப் பேசப் போகிறார்?" – திமுக கூட்டணி குறித்து அண்ணாமலை கேள்வி

June 16, 2025
NewsEditor
General
0

2026 தமிழ்நாடு சட்டப்பேரவைத் தேர்தலை மையமாக வைத்து இப்போதே அரசியல் கட்சிகள் கூட்டணிக் கணக்குகளை வகுக்க ஆரம்பித்துவிட்டன.

அரசியல் களத்தில் கூட்டணி குறித்த விவாதங்கள்தான் சூடுபிடிக்க ஆரம்பித்துவிட்டன.

திருமாவளவன்

அ.தி.மு.க, பா.ஜ.க கூட்டணி உறுதியாகிவிட்ட நிலையில் இரண்டு கட்சிகளும் தேர்தலுக்கான வியூகங்களை வகுக்கக் களமிறங்கிவிட்டனர்.

அ.தி.மு.க தலைமையில்தான் கூட்டணி அமையும் என்று கூறப்பட்டிருந்த நிலையில், பா.ஜ.க கூட்டணியில் தலைமை அதிகாரத்தைக் கைப்பற்றத் திட்டங்கள் தீட்டுவதாகக் கூட்டணிக்குள்ளேயே சலசலப்புகள் கிளம்பியிருக்கின்றன.

இது குறித்து தமிழக பாஜக முன்னாள் தலைவர் அண்ணாமலை பேசுகையில், “2026-ல் அமையப்போவது கூட்டணி ஆட்சி என்று நான் சொல்லமாட்டேன். அது பா.ஜ.க ஆட்சி என்றே சொல்வேன். வரும் தேர்தலில் பா.ஜ.க அதிக இடங்களில் போட்டியிட வேண்டும் என்று நினைப்பவன் நான்” என்று கூறியிருந்தார்.

இதற்கிடையில் கூட்டணி குறித்து, “‘பேசவேண்டிய நேரத்தில் மீசையை முறுக்கிப் பேசுவேன்’ என்று திருமாவளவன் பேசியிருந்தார்.

தூத்துக்குடியில் பனை மரம் ஏறி கள் இறக்கிய சீமான்.!

இது குறித்துப் பேசியிருக்கும் அண்ணாமலை, “விஜய்யின் த.வெ.க கட்சியானது, மத்தியில் பா.ஜ.க, மாநிலத்தில் தி.மு.க எதிரி என அறிவித்திருக்கிறது. த.வெ.க-வில் இனிதான் கூட்டணி குறித்த பேச்சுவார்த்தைத் தொடங்கப்போகிறது.

கூட்டணி வரும்போதுதான் அந்தந்தக் கட்சியின் கொள்கை பற்றித் தெரிய வரும். பா.ம.க கூட்டணி குறித்த பேச்சுவார்த்தையில் இருக்கிறது.

இப்போதைக்கு தி.மு.க கூட்டணிதான் கொஞ்சம் குளறுபடியில் இருக்கிறது. அண்ணன் திருமாவளவன் அவர்கள் ‘பேசவேண்டிய நேரத்தில் மீசையை முறுக்கிப் பேசுவேன்’ என்று கூறியிருக்கிறார்.

அவர் எப்போ பேசப்போகிறார் என்பதைப் பார்க்க நாங்களும் காத்திருக்கிறோம்” என்று விமர்சித்திருக்கிறார்.

சீமானின் கள் இறக்கும் போராட்டம் குறித்து, “கள் இறக்கும் போராட்டத்திற்கு எங்களின் முழு ஆதரவு இருக்கிறது. தடையை உடைக்க வேண்டும் என்பதே எங்கள் நோக்கம். தடையை மீறச் செய்வதில் எங்களுக்கு உடன்பாடில்லை. சட்டப்படி நின்று தடையை நீக்கப் போராட்டம் செய்வதே எங்களின் நோக்கம்” என்று பேசியிருக்கிறார்.