சென்னை: பிரபல நடிகர் ராஜேஷ், உடல்நலக் குறைவால் சென்னையில் நேற்று காலமானார். அவருக்கு வயது 75. அவரது உடலுக்கு முதல்வர் ஸ்டாலின் உள்ளிட்ட தலைவர்கள் அஞ்சலி செலுத்தினர். ஆளுநர் உட்பட பலரும் இரங்கல் தெரிவித்துள்ளனர். திருவாரூர் மாவட்டம் மன்னார்குடியில் கடந்த 1949-ம் ஆண்டு பிறந்தவர் ராஜேஷ்.
1972-79 காலகட்டங்களில் சென்னையில் ஆசிரியராக பணியாற்றினார். இதற்கிடையே, 1974-ம் ஆண்டு கே.பாலசந்தரின் ‘அவள் ஒரு தொடர்கதை’ படத்தில் நடிகராக அறிமுகமானார். பின்னர் ராஜ்கண்ணு தயாரிப்பில் கே.பாக்யராஜ் இயக்கிய ‘கன்னி பருவத்திலே’ படம் மூலம் கதாநாயகனாக அறிமுகமானார்.
