ஒட்டிப் பிறந்த சகோதரிகளைக் கைவிட்ட பெற்றோர்; 13 ஆண்டுகளாக வளர்க்கும் மருத்துவமனை; நெகிழ்ச்சி பின்னணி

May 9, 2025
NewsEditor
General
0

மும்பையில் உள்ள வாடியா மருத்துவமனை குழந்தைகளுக்கானது. இம்மருத்துவமனையில் பன்வெல் பகுதியைச் சேர்ந்த தம்பதிக்கு உடம்பின் கீழ்ப் பகுதி ஒட்டிய நிலையில் இரட்டை குழந்தைகள் பிறந்தன.

அக்குழந்தைகளைத் தனித்தனியாகப் பிரித்து வளர்ப்பது சிரமம் என்று கருதி அக்குழந்தையின் பெற்றோர் குழந்தைகளை மருத்துவமனையில் அனாதையாக விட்டு விட்டுச் சென்று சென்றுவிட்டனர்.

இதையடுத்து மருத்துவமனை நிர்வாகமே குழந்தைகளைத் தங்களது பொறுப்பில் எடுத்து அவர்களுக்கு ரித்தி மற்றும் சித்தி என்று பெயரிட்டு வளர்த்தனர்.

பிறந்தநாள் கொண்டாடிய ரித்தி, சித்தி

அக்குழந்தைகள் இடுப்புக்குக் கீழே ஒட்டிய நிலையில் பிறந்திருந்தனர். அவர்களை மருத்துவர்கள் 30 மணி நேரம் கடினமான ஆப்ரேசன் செய்து இருவரையும் தனித்தனியாகப் பிரித்தனர்.

குழந்தைகளைத் தனித்தனியாகப் பிரித்த பிறகும் தொடர்ந்து அதே மருத்துவமனையில் வைத்துப் பராமரித்து வந்தனர்.

கடந்த 10 ஆண்டுகளுக்கும் மேலாக இரண்டு குழந்தைகளும் இதே மருத்துவமனையில் மருத்துவர்கள் மற்றும் செவிலியர்களின் கண்காணிப்பில் தொடர்ந்து இருந்து வருகின்றனர்.

அவர்களுக்கு அடிக்கடி பிசியோதெரசி தேவைப்படுகிறது. அவர்களுக்குத் தேவையான மருந்து, கல்வி போன்ற அனைத்தையும் மருத்துவர்களும், செவிலியர்களும் செய்து கொடுக்கின்றனர்.

அவர்கள் இரண்டு பேரையும் பிரிக்க ஆப்ரேசன் செய்த மருத்துவர் பிரத்னயா இது குறித்து கூறுகையில், ”மருத்துவர்களும், செவிலியர்களும் அவர்களுக்குத் தேவைப்படும்போது உடனிருக்கின்றனர்.

இரண்டு பேருக்கும் இருக்கும் சில பிரச்னைகளை ஒரு போதும் சரி செய்ய முடியாது. ஆனாலும் இரண்டு பேரும் அதனைத் தகுந்தபடி கையாள்கின்றனர்.

குடல் இரைப்பை பிரச்னை இன்னும் இருந்து கொண்டுதான் இருக்கிறது. ஆனால் அவர்களுக்கு நல்ல எதிர்காலம் இருக்கிறது. நன்றாகப் படிக்கின்றனர். அவர்களின் சிறுநீரகம் சிறப்பாகச் செயல்படுகிறது” என்று தெரிவித்தார்.

இரண்டு குழந்தைகளுக்கும் இப்போது 13 வயதாகிவிட்டது. அவர்கள் தங்களுக்குச் சிகிச்சையளிக்கும் மருத்துவர்கள் மற்றும் செவிலியர்கள் சூழ தங்களது 13வது பிறந்தநாளைச் சிறப்பாகக் கொண்டாடினர்.