சாத்தூர் அருகே துணி துவைப்பதற்காகச் சென்ற பெண் தவறி கிணற்றுக்குள் விழுந்தார். அவரைக் காப்பாற்றும் முயற்சியில் கிணற்றுக்குள் குதித்த கணவர் மற்றும் அப்பெண்ணின் மாமியார் என இருவர் நீரில் மூழ்கிப் பலியான சம்பவம் பெரும் சோகத்தை ஏற்படுத்தியுள்ளது.
இது குறித்து போலீஸிடம் விசாரித்தோம். அப்போது நம்மிடம் பேசியவர்கள், “விருதுநகர் மாவட்டம் சாத்தூர் ஏழாயிரம் பண்ணை அருகில் உள்ள மடத்துப்பட்டி கிராமத்தைச் சேர்ந்த ராஜா (வயது 38).
இவரின் மனைவி மகேஸ்வரி. இவர், தனது வீட்டின் அருகில் உள்ள கிணற்றில் துணி துவைக்கச் சென்றுள்ளார். அப்போது எதிர்பாராத விதமாக மகேஸ்வரி கிணற்றினுள் தவறி விழுந்ததாகக் கூறப்படுகிறது.
இந்நிலையில் மகேஸ்வரியின் அலறல் சத்தம் கேட்டு அவரின் கணவர் ராஜா மற்றும் அப்பெண்ணின் மாமியார் ராசம்மாள் இருவரும் பதறியடித்து ஓடிவந்தனர்.
அப்போது கிணற்றினுள் மகேஸ்வரி விழுந்து உயிருக்குப் போராடுவதைப் பார்த்ததும், அவரைக் காப்பாற்றும் பொருட்டு ராஜாவும், ராசம்மாளும் கிணற்றுக்குள் குதித்துள்ளனர்.
இந்நிலையில் நீரில் குதித்த இருவரும் நீச்சல் அடிக்க முடியாமல் மூச்சுத்திணறி நீருக்குள் மூழ்கியதாகக் கூறப்படுகிறது. இதைப் பார்த்த அக்கம்பக்கத்தினர் இதுகுறித்து உடனடியாக ஏழாயிரம் பண்ணை காவல் நிலையம் மற்றும் தீயணைப்பு மீட்பு துறையினருக்குத் தகவல் அளித்தனர்.
அதன்பேரில் சம்பவ இடத்திற்கு விரைந்து வந்து ஏழாயிரம் பண்ணை தீயணைப்பு மீட்புப் பணி வீரர்கள் கிணற்றுக்குள் நீரில் மூழ்கிய மூவரையும் மீட்கும் பணியில் ஈடுபட்டனர்.
இதில் மகேஸ்வரியை மட்டும் பத்திரமாக உயிருடன் மீட்கப்பட்டு சிகிச்சைக்காக சாத்தூர் அரசு மருத்துவமனைக்கு அனுப்பி வைக்கப்பட்டார்.
தீயணைப்பு வீரர்களின் தீவிர தேடுதலுக்குப் பிறகு மகேஸ்வரியின் கணவர் ராஜா மற்றும் மாமியார் ராசம்மாள் ஆகிய இருவரும் சடலமாக மீட்டனர்.
இதையடுத்து அவர்களின் இருவரின் உடல்களும் சாத்தூர் அரசு மருத்துவமனைக்கு உடற்கூராய்வுக்காக அனுப்பி வைக்கப்பட்டது.
இந்த சம்பவம் குறித்த புகாரின்பேரில் போலீஸார் வழக்குப்பதிவு செய்து விசாரணை நடத்தி வருகின்றனர்” என்றனர்.
துணி துவைக்கச் சென்ற பெண் கிணற்றுக்குள் தவறிவிழுந்ததையடுத்து காப்பாற்ற முயன்ற கணவர் மற்றும் மாமியார் நீரில் மூழ்கி உயிரிழந்த சம்பவம் அப்பகுதியில் பெரும் சோகத்தை ஏற்படுத்தியுள்ளது.
Junior Vikatan-ன் பிரத்யேக Whatsapp Group…
இணைவதற்கு இங்கே க்ளிக் செய்யவும் https://bit.ly/3OITqxs
வணக்கம்,
BIG BREAKINGS முதல்… அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.
ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்… https://bit.ly/3OITqxs
